Sumarfrí á næsta leiti

Núna situr maður við próflestur á bókasafninu og er að læra undir síðasta prófið sem er í fyrramálið. Síðan er ætlunin að yfirgefa borg óttans og bruna norður um helgina, síðan fer maður bara á fullt í vinnu í næstu viku. Annars er það að segja að ég er orðinn rosalega leiður á öllum þessum prófalestri og verð dauðfeginn þegar þetta verður búið.
Tók mér smá hvíld frá próflestrinum í gærkvöldi og setti upp nýja prentaran hans Sigurgeirs. Þetta er alveg mögnuð græja, heitir Canon 800 og eitthvað og prentar ljósmyndir í fínustu gæðum, eitthvað annað en gamla skranið sem prentaði allt í rósrauðu, það eina sem sá gripur var nothæfur í var að prenta texta.
En ég verð að segja að það er skrítin tilfinning að um þetta leyti á morgun verð ég kominn í sumarfrí, hef farið í sumarfrí í lok maí eða byrjun júní og hefur það verið þannig í hálfan annan áratug en þetta verður óneitanlega skemmtileg tilbreyting. Síðan er maður bara farinn að hlakka mikið til útskriftarafmælisins í sumar, það verður gaman að hitta allt liðið aftur og þá verður djammað og djúsað langt fram á nótt ef ég þekki þetta lið rétt.