Og hann skýtur og hann skorar... eða eitthvað

Jæja, byrja ég að bulla eitthvað aftur. Ætli maður sé ekki að bæta upp fyrir blogletina í sumar. Annars hefur nú lítið gerst síðan síðast enda er það takmarkað sem kemur fyrir mann á einum sólarhring. Fór reyndar út að ganga með hund frænda míns í dag þar sem hann var ekki heima, frændi minn sko en ekki hundurinn, enda væri það til lítils að fara út að ganga með hund sem ekki er heima... hmmm, þarna fór ég aðeins fram úr sjálfum mér. Allavega þá fór ég út að ganga með þennan hund tvisvar í dag og upplifði í fyrsta skipti þann magnaða leik að kasta priki og láta hundin sækja það. Þetta er einhver svona klisja sem maður hefur séð í ótal amerískum bíómyndum þar sem fjölskyldan lifir fullkomnu lífi og krakkinn er út í garði eða eitthvað álíka að láta hundinn sækja prik. Ótrúleg upplifun alveg hreint.

Mér var litið í spegil í morgun og tók eftir svolitlu sem ég hef gefið lítinn gaum það sem af er sumri. Ég er ekki lengur með dökkbrúnt hár heldur lítur það einna helst út fyrir það að ég sé með ljósar strípur sem er svoldið skrítið þar sem ég hef ekki komið nálægt hárgreiðslustofu síðan í byrjun maí auk þess sem mér hefur aldrei nokkurn tíma komið það til hugar að fá mér strípur. Held að þetta stafi af því hversu mikið maður hefur verið að vinna úti í sólinni í sumar en það hefur einnig leitt til þess að maður hefur fengið lit í andlitið en er ekki fölur eins og eyðnisjúklingur á lokastigi eins og maður var eftir alla inniveruna í kísiliðjunni. Svo er maður orðinn svoldið loðinn um hausinn, eins og þið getið rétt ímyndað ykkur, eftir að hafa ekki farið í klippingu í rúma þrjá mánuði. Hluti af mér getur ekki beðið eftir að setjast í stólinn og láta fjarlægja þetta en hins vegar er partur af mér sem segir mér að halda í þetta þannig að maður er í smá klemmu hérna, á lubbinn að fara eða ekki?!

Ákvað að enda þetta á einni spurningu sem mér datt í hug að slá fram eftir að hafa séð þessar “pulsa sig niður” auglýsingar, er það pylsa eða pulsa? Það verður gaman að sjá hversu margir þarna úti halda því fram í örvæntingu sinni að það eigi að segja pulsa.