gestur.blogspot.com

Eins og sjá má á síðustu færslu þá skrapp ég til Glasgow um helgina og kom til baka í dag þannig að nú er komið að því að gefa skýrslu um þessa miklu ferð.

Þetta byrjaði allt á föstudaginn þegar ég vaknaði einhverntíma á bilinu hálf 5 til 5. Afi mætti svo sprækur í Breiðholtið til að keyra mig út á flugvöll. Eftir að starfsmaður flugvallarins sýndi mér hvernig innritunarvél virkar þá var kominn tími til að koma sér í gegnum öryggiseftirlitið og þá var ég alveg lost. Ég hafði ekki komið í Leifsstöð síðan í útskriftarferðinni í MA 2002 og það er víst búið að breyta henni pínku ponsu lítið síðan þá, já, heimurinn er skelfilegur staður. Þurfti að fara tvisvar í gegnum öryggiseftirlitið þar sem því væri alveg stolið úr mér að það væri bannað að taka með sér vökva í handfarangri, fjárans rakdót. Allavega eftir að hafa komið mér í gegnum alla flugstöðina og út í vél þá var loksins lagt af stað. Eftir að hafa lesið moggann, borðað hina unaðslegu eggjaköku sem Icelandair býður upp á og smá svefn þá var lent í Glasgow. Tók taxa þangað sem Sirrý bjó. Vissi svosem ekki hverju ég átti von á í sambandi við húsmóðurina, bjóst hálfpartinn við þríhöfða skrímsli sem myndi mæta mér þarna, alla vega miðað við lýsingarnar hjá Sirrý, en þetta virtist vera ósköp almennilegt kona en eins og þeir segja, oft er flagð undir fögru skinni. Dagurinn fór svo í bæjarrölt og ég fékk að hitta Carmen, vinkonu Sirrýar. Þegar fór að líða á daginn fór ég hins vegar að finna fyrir mikilli þreytu svo við ákváðum að halda heim á leið. Þegar þangað var komið lagðist ég útaf og sofnaði á staðnum. Svo fór kvöldið bara í afslöppun og barnapössun hjá Sirrý.

Laugardagurinn var svo tekinn snemma þar sem haldið var af stað til að skoða Loch Ness. Ég, Sirrý og Carmen héldum þarna í gott 12 tíma ferðalag um Hálöndin. Það var smakkað á viskíi, siglt á Loch Ness (reyndar fór ég einn í það þar sem Sirrý tímdi ekki að fara aftur og Carmen nennti ekki), skoðað Urquhart kastala og tekið marga tugi mynda af kastalanum og vatninu, held ég hafi ekki náð mynd af Nessie en ég á eftir að skoða myndirnar betur. Svo má alltaf redda þessu með Photoshop. Svo var rúntað áleiðis til baka til Glasgow og þegar þangað var komið tjáði bílstjórinn okkur það að við hefðum ekið um 600 km um daginn. Skruppum svo stað sem heitir Walkabout og drukkum nokkra bjóra þar áður en haldið var heim á leið. Þessir Walkabout staðir eru algjör snilld, þeir eru út um allt Bretland og eru veitingastaðir á daginn, en á kvöldinn og nóttunni byrjar partýið. Það var hins vegar þegar komið var heim sem dramað byrjaði og þá fékk ég að sjá hvers konar fólk þetta var sem Sirrý hefur þurft að eiga við undanfarna mánuði. Sirrý leyfði mér að sofa í rúminu sínu og sótti svo dýnu til að sofa á á gólfinu. Þegar við komum svo aftur eftir Loch Ness ferðina var dýnan horfin, þar sem stelpurnar voru með sleepover þá þótti það vera besta lausnin að vaða inn í herbergið hjá henni og hrifsa dýnuna sem hún var með í stað þess að taka aðra dýnu sem var í rúminu hjá stelpunum sem Sirrý fékk svo eftir mikið japl og jaml og fuður. Þetta japl og jaml og fuður út af þessari dýnu var hins vegar dropinn sem fyllti mælinn og á sunnudeginum skráðum við okkur inn á Hostel niðri í miðbæ.

Sunnudagurinn fór svo að mæstu í rólegheit, röltum um Glasgow og kíktum meðal annars á Starbucks. Mánudagurinn var svo tekinn snemma og haldið var til Edinborgar. Við vorum komin þangað um klukkan 11, fórum í túrista rúnt um borgina á opnum tveggja hæða strætó. skoðuðum kastalann og svo það besta, fórum á stað sem heitir "The Edinburgh Dungeon", gott fyrir þá sem vilja láta hræða sig all duglega. Fórum svo aftur til baka til Glasgow og vorum komin þangað um klukkan 4. Um kvöldið var svo komið af kveðjustund og þurfti Sirrý að kveðja alla þá vini og kunningja sem hafði eignast þarna. Sátum að spjalla á Hostelbarnum þar til klukkan var farin að nálgast miðnætti. Svo var vaknað klukkan 7 í morgun, mættum á völlinn kl. 9 og flugið fór upp úr hálf 11. Svo var lent hérna heima rétt fyrir 1 og var afi mættur á svæðið til að sækja okkur.